ပြည်နယ်၊ တိုင်း ဝန်ကြီးချုပ်နေရာအားလုံးကို NLD အမတ်များထဲမှ ရွေးမည်
အမျိုးသားဒီမိုကရေစီအဖွဲ့ချုပ် (NLD) အစိုးရလက်ထက် တိုင်းဒေသကြီးနှင့် ပြည်နယ် ဝန်ကြီးချုပ် နေရာများအတွက် ပါတီ၏ ရွေးကောက်ခံ လွှတ်တော် ကိုယ်စားလှယ်များကိုသာ ခန့်အပ်မည်ဟု NLD ဗဟိုအလုပ်အမှုဆောင်အဖွဲ့ အတွင်းရေးမှူး ဦးဝင်းထိန်က မတ်လ ၁ ရက်နေ့တွင် ပြောလိုက်သည်။
ပြည်နယ်၊ တိုင်း ဝန်ကြီးချုပ်များကို သမ္မတက ရွေးချယ်ခန့်အပ်ရမည်ဟု အခြေခံဥပဒေတွင် ပြဋ္ဌာန်းထားသည်။
ရခိုင်ပြည်နယ်လွှတ်တော်တွင် နေရာအများစု ရရှိထားသော ရခိုင်အမျိုးသားပါတီက ပြည်နယ်ဝန်ကြီးချုပ်နေရာ ရလိုကြောင်း တောင်းဆိုထားသည်။ (ကိုးကား - Daily Eleven)
ဧရာဝတီလင်းပိုင် ၆၅ ကောင် မှတ်တမ်းတင်နိုင်ခဲ့
ဧရာဝတီမြစ်ကြောင်းတလျှောက် ဗန်းမော်နှင့် မန္တလေးကြားတွင် ဧရာဝတီလင်းပိုင် ကောင်ရေ ၆၅ ကောင် ရှိကြောင်း ငါးလုပ်ငန်းဦးစီးဌာနနှင့် WCS သားငှက်ထိန်းသိမ်းရေးအဖွဲ့တို့ ဖေဖော်ဝါရီ လကုန်ပိုင်း မြစ်အတွင်း ပြုလုပ်သော လင်းပိုင်ထိန်းသိမ်းရေး သုတေသနပြုချက်အရ သိရသည်။
မျိုးသုဉ်းမည့်စာရင်းတွင် ပါဝင်နေသည့် ဧရာဝတီလင်းပိုင်များ ထိန်းသိမ်းစောင့်ရှောက်ရေးမှာ ဒေသခံနှင့် ပြည်သူများ ပူး ပေါင်းကူညီရမည်ဖြစ်ပြီး ရှော့ခ်တိုက်ငါးဖမ်းခြင်း၊ မြစ်အတွင်း စီးပွားဖြစ်ရွှေတူးဖော်ခြင်း၊ မြစ်ရေညစ်ညမ်းစေခြင်းတို့သည့် လင်းပိုင်များ သွားလာနေထိုင်မျိုးပွားမှုအတွက် ထိခိုက်သည့် လုပ်ရပ်များဖြစ်ကြောင်း မန္တလေးတိုင်းဒေသကြီး ငါးလုပ်ငန်း ဦးစီးဌာန ဒုတိယဦးစီးမှူး ဦးဟန်ဝင်းက ပြောသည်။
ယခင်စစ်တမ်းများကိုကြည့်လျှင် ၂ဝ၁၃ တွင် ၆၃ ကောင်၊ ၂ဝ၁၄ တွင် ၅၈ ကောင် ရှိကြောင်း သိရသည်။ (ကိုးကား - မြန်မာ့အလင်း)
မတ်လအတွက် ရေအရေးပေါ်အကူအညီတောင်းထားသည့်ရွာ ၉ဝဝ ကျော်ရှိ
ရေအခက်အခဲကြောင့် မတ်လအတွက် သောက်သုံးရေ အရေးပေါ်အကူအညီတောင်းခံထားသည့် ကျေးရွာ ပေါင်း ၉၈၁ ရွာရှိကြောင်း ကျေးလက်ဒေသဖွံ့ဖြိုးတိုးတက်ရေး ဦးစီးဌာနမှ ဒုညွှန်ချုပ် ဦးကျော်သူအောင်က ပြောသည်။ ရေအခက်အခဲကြုံတွေ့နေရသည့် ကျေးရွာများမှာ ဧရာဝတီ၊ ပဲခူး၊ ရှမ်း၊ ရခိုင်၊ မန္တလေး စသည့် ဒေသတို့တွင် တည်ရှိသည်ဟု ဆိုသည်။
ယခင်နှစ်နွေရာသီက ၄၆၄ ရွာသာ ရေရှားပါးပြတ်လပ်ခဲ့သော်လည်း ယခုနှစ်တွင် ရွာ ၁,၇ဝဝ ကျော် ရေအခက်အခဲတွေ့နိုင်ကြောင်း ယင်းဦးစီးဌာနက သတင်းထုတ်ပြန်ထားသည်။ (ကိုးကား - 7Day Daily)